((حبّة الرمّان وحبّة التوت))

وأقول فيها

يا حبة الرمان يا حبة التوت
شوفوا حبيبي كيف كدر مزاجي


صحيح حبه داخل القلب منحوت
لكن في شوفه يزيد إنزعاجي


خلاص قولوله ترا فاته الفوت
رمّانتي حطيتها فوق تاجي


والتوته الي ثغرها ثغر كتكوت
فزّت هلا لبيه عند إحتياجي


الشاهد الله كنهن خلطة فروت
والشاهد الله هن دواي وعلاجي


إفبعدهن حسيت في سكرة الموت
وبقربهن أفرح وأفل الحجاجي


كني أسير (ن) قابع (ن) في بطن حوت
وأشوفهن حرّيتي وإنفراجي


توته ورمانه على شكل ياقوت
سيقانهن تصلق شرات الزجاجي


إليازيه تسوى مزايين بيروت
أمّا مها نور (ن) وسط ليل داجي

حلاتهن تلقونها فنبرة الصوت
لمّـيتهن ما بين صدر وسياجي


يا هو حلا فيهن يخليكم سكوت
ويزيدني في كل لحظه إبتهاجي


لمست يديهن شلت أحزان مكبوت
وعيونهن ما بين نعسا ودعاجي


حب إزدواجي !! صابني وصرت مبخوت
تدرون وش أقصد بحب إزدواجي؟


بناتي الثنتين وآحبهن موت
ما غيرهن عدّل وكيّف مزاجي

أخوكم
الشاعر إليازي